| Sie sind hier ::Bücher ::Leseprobe Leseprobe: |
| Rimels un lütt Geschichten von Wolfgang Mahnke, |
Nieges von dei GenforschungRostock (Plattdütsche-Presse-Agentur/PPA/November 2004). In’t Internationale Genforschungszentrum Nipohakawuwu (IGN), Afrika, hebben dei Wissenschaftler sensationelle Entdeckungen in Tausamenhang mit dei Gene XP3/08 un XP3/09 makt. Dat Zentrum Nipohakawuwu liggt midden in’n afrikanschen Busch, dei dor Urwald heit un is 1992 mit Hülp von dei UNO direktemang näben dat grote Schimpansen-Reservat in Westafrika upbugt worden. Worüm grad dor? Dei Wissenschaftler meinen, dat dor, orer tauminnest nich wiet af, dei Weig för dei Minschheit stahn hett. Un dorüm nähmen sei an, dat dei Gene in disse Gegend noch nich so afnutzt sünd, as annerwägens up uns’ Ierd, wur sei sick bi lange Völkerwannerungen, tau’n Bispill nah Kanada, afschläpen hebben. Dei niegsten Forschungsergäwnisse wiesen uns: Dat IGN steiht an’ne richtig Stell. Disse Gene XP3/08 un XP3/09, dei blot bi Frugens vörkamen, sünd verantwurdlich för: „Du hest Schuld“ un „Ick hew Recht“. Dat heit, dei Wissenschaftler sünd bether dorvon utgahn, dat sick dat üm twei Gene hannelt. Nu dei Sensation: Dat is blot ein un hürt tau dei seltenen Y-Gene! Dat Y steckt mit ’n Faut in’ne Basis un an dei beiden Y-Tentakel sitt an den’n einen „Du hest Schuld“ un an den’n annern „Ick hew Recht“. Je nah Stimmungslag gäwen sei dat Signal an’t Gehirn. Wat för ein wissenschaftlich Leistung, dit uteinanner tau plücken. „Du hest Schuld“ (XP3/08) un „Ick hew Recht“ (XP3/09) liggen so dichting bi’nanner, dat dat blot bi ganz lütt bäten afschüerte Gene tau’n Vörschien keem. Dat IGN giwt nu dei niege bigenale Formel för „Du/ick hest/hew Schuld/Recht“ bekannt. Sei heit: XP3/Y17, falls Sei eins sülben nahkieken müchten, wenn’S grad Stried hebben mit den’n annern Deil! |
Zurück: Bücher | Seitenanfang | 22.11.2004 | ©Grafik, Druck & Verlag GmbH |
