Das Uprüsten un Utlopen
Wenn alle Welt von´t Afrüsten räd, ward woll keinein von´t Uprüsten schriewen. Ick möt, dit Uprüsten is wat anners, as för ein Landrott. Uprüsten heit seemännisch, dat allens, wat för dei negst Seereis brukt ward, an Burd kümmt. Dat Uprüsten füng dormit an, dat dei Besatzung wedder an Burd keem. Bet dorhen hard sik dei Damper bäten utrauht. Hei wier nah dei letzt Reis an ein afseitig Städ in´n Ollen Fischereihaben schleppt worden. Dor täuwte hei gedürig up sienen niegen Törn. Dat Wachkommando kümmerte sik´n bäten üm em, oewer süss wier´t musingstill an Burd. Mit dat Intrecken von dei Stammbesatzung keem wedder Beweer in´t Schipp. Dei Damper würd ut´n Schlap räten un verhalt. Dei´n tiedlang afklemmt Adern würden wedder anklemmt. Hupenweis Kabel un Schläuch kröpen oewer dei Reling. Schweißbrenner, ok Schlauchsagen nömt, blitzen up u Bohrmaschinen hulten. Dei Betriebsgäng wien mit Papp utleggt, dormit dei Schmeer ut´n Maschinenrum nich up´t Linoleum fastpedd würd. Dei Reparaturbrigad wier an´t marachen. | |
